حل أبطال مسلسل “في بيتنا روبوت” ضيوفا في برنامج “صاحبة السعادة” الذي تقدمه الفنانة إسعاد يونس عبر شاشة dmc.

وخلال الحوار تحدث كل من هشام جمال وليلى زاهر وشيماء سيف وعمرو وهبة عن أسرار المسلسل نستعرضها لك في السطور التالية:

هشام جمال

-مسلسل “في بيتنا روبوت” استعرض مشاكل المتزوجين حديثا في أول سنة زواج وكان مكتوب من 2019 والديكور كان جاهز من أول 2020 من قبل مسلسل “النهاية” واتوقف عشان أزمة كورونا.

-اتصلت بالفنانة دلال عبد العزيز لإقناعها بالمشاركة في المسلسل ودعمتني في أول تجربة تمثيلية ليا .. هي عملت دور الأم وكان دمها خفيف ومتصدقة ووجودها كان قيمة كبيرة في المسلسل ومكالمتي معاها مخدتش دقيقتين.

-بتفائل بعيلة الفنان سمير غانم يعني دنيا أول واحدة دعمتني وهنتني بنجاح المسلسل.

-اتسندت في أول تجاربى التمثيلية على شيماء سيف وعمرو وهبة، لأن أنا أول مرة أمثل ومش من حقى أن اسمى يبقى قبلهم في التتر.

-فكرة المسلسل الأول كنا هنعمل 3 قصص زى مسلسل بدل الحدوتة 3 للنجمة دنيا سمير غانم، وأن 3 قصص يكونوا مختلفين.

– مدينا الحلقات من ١٥ ل٢٠ حلقة وبعد رد الفعل العظيم من الجمهور لقينا مطالبات بجزء تاني.

– بحب في الشارع اسأل الناس بتتفرج على المسلسل فين على التلفزيون أو النت ولا على منصة watch it وببقى مبسوط بردود الفعل جدا.

شيماء سيف

-كنت مرعوبة فى تقديم الروبوت وعندى ثقة فى هشام كبيرة وسيبت دماغى لهشام وصليت استخارة والموضوع مشى وكنت بقولهم إزاى فى روبوت بلغد كده.

-الكواليس كلها كانت ضحك وكنت لابسه باروكة قرعة وفى يوم تصوير زوجى كارتر جه على غفلة وميعرفش إنى لابسة باروكة “قرعة” وعليها إيشارب ولما شيلته اتفزع واترعب.

عمرو وهبة

-أول لما جات الفكرة كنت متحمس جدا وتجربة صعبة وقلت لو نجح هينجح أوى لأننا بنصنع فورمات جديد.

-طول فترة التصوير كنت قلقان، وكنت بقول إن إحنا هنتشاف كويس وننجح، بس مكنتش متخيل أن إحنا هننجح أوى كده، ومن الحلقات الأولى.

ليلى زاهر

-سارة أحلى دور عملته في حياتى، والناس في الشارع بتوقفنى تقولى حرام عليكى اللى بتعمليه في يوسف ومشاريعك الفاشلة، بقول والله أنا ليلى وسارة في المسلسل.

-شيماء سيف كانت علطول بتعمل فينا مقالب في الكواليس.