عرق الروستو بالخضراوات… وبيتزا الفواكه على سفرة دايمة

سلطة يونانية
المقادير:

• 4 حبات طماطم كبيرة
• كوب جبن فيتا مكعبات
• 4 ملاعق زيت زيتون
• ملعقة صغيرة ريحان
• 16 زيتون كلاماتا
• 1/ 2 بصلة
• حبة خيار

الطريقة:
1- قطّعي الطماطم مكعّبات كبيرة، والخيار قشّريه وقطّعيه قطع كبيرة، والبصل قطعيه حلقات رفيعة.

2- اخلطي كل المكونات ومكعبات الجبنة الفيتا، وحطي عليهم الزيت، وقدميها مع عيش محمص. بالهنا والشفا.

*******************

شوربة الفراخ بالفلفل الحراق
المقادير:

• 2 كوب فاصوليا بيضاء مسلوقة
• 2 حبة فلفل أحضر حار مفروم
• 2 حبة فلفل أحمر حار مفروم
• 3 فصوص ثوم مفرومين
• ملعقة صغيرة فلفل أسود
• 2 ملعقة صغيرة كمون
• ملعقة صغيرة بهارات
• 3 شرائح صدور فراخ
• 3 كوب شوربة فراخ
• ملعقة زيت أو سمنة
• جبن شيدر
• بصلة

الطريقة:
1- افرمي البصل وشوّحيه في الزيت لحد ما يدبل ولونه يبقى شفاف.

2- بعد كدة حطى عليه الثوم والفلفل الأخضر والأحمر والكمون والبهارات والفلفل الأسود وشوّحيهم شوية كمان لمدة 3 دقائق.

3- حطي الشوربة والفاصوليا، وقطّعي الدجاج مكعبات وحطيهم مع الشوربة، وسيبيها على النار لمدة 15 دقيقة، أو لحد ما الفراخ تستوى.

4- ارفعيها من النار وحطي عليها الجبنة، وقدّميها ساخنة. بالهنا والشفا.

*******************

عرق الروستو بالخضراوات
المقادير:

• عرق بتلو
• 2 ملعقة كبيرة سمن
• ملح وفلفل وبهارات
• 8 فصوص ثوم أو حسب حجم العِرق
• خضراوات مشكّلة (بطاطس – بصل – جزر – فلفل ألوان)

الطريقة:
1- خرّمي العِرق بطرف السكينة على مسافات متباعدة، واغرزي في كل خرم فص ثوم.

2- تَبّلي العِرق بالملح والفلفل والبهارات وحطي أي توابل أو إضافات إنتِ تحبيها، ولفّي العِرْق بالخيط كويس أوي، وسيبيه 3 ساعات في التتبيلة.

3- سيّحي الزبدة في صينية، وشوّحي فيها العِرق من كل الجوانب لحدّ ما يحمرّ.

4- في الوقت ده حضّري الخضار وقطعيه بأشكال طولية أو عرضية، ورشي عليه الملح والفلفل الأسود والبهارات والزعتر وشوية زيت.

5- حطي الخضار على العِرق ولفي الصينية بورق الفويل، ودخّليها الفرن على درجة حرارة عالية.

6- اختبري العرق بإنك تغرسي فيه السكين، ولو خرجت مبلولة يبقى لسه ماستوتش، ولو ناشفة يبقى كده استوت.

7- بعد ما العِرق يستوي ارفعيه من الصوص، وسيبيه لحدّ ما يبرد، وقطّعي شرائح متوسطة السُمك، ورصّيها في طبق التقديم مع الخضار المشكل.

8- عند التقديم سخّني الصوص، وصبّيه على شرائح اللحم، وبالهنا والشفا.

*******************

كشك على الطريقة المصرية
المقادير:

• 2 ملعقة كبيرة دقيق
• 2 ملعقة سمنة
• 2 كوب شوربة
• بصلة صغيرة
• كوب زبادي
• 2 كوب لبن
• مرقة دجاج

الطريقة:
1- حطي اللبن ومعاه الشوربة على النار، وحطي عليهم الزبادي، ودوّبيه كويس.

2- دوّبي الدقيق في شوية ميه أو لبن، وحطيهم في اللبن، وقلّبي على طول لحدّ ما يوصل للقوام اللي تحبيه.

3- لو حسيتِ إن قوامه خفيف، ممكن تزوّدي ملعقة دقيق، وتقلّبي لحدّ ما القوام يتظبط.

4- حمّري البصلة في السمنة، ولما تتحمّر ارفعيها، وصبّي السمنة المتبقية منها على الكشك.

5- اغرفي الكشك في أطباق وزيّنيها بالبصل المحمر. وبالهنا والشفا.

*******************