السكر
توقعات ونيس حصلت
– حاولي تستوعبي اللي أنا بقوله ، حاولي تكوني على مستوى المسؤولية ، فاهميني .. البيت بياخُد مصاريف الشهر ٨٠٠ جنيه ؟
= تقريبًا
– مفيش حاجة إسمها تقريبًا إحنا كل قرش بنعرق ونشقى فيه وبيتهدر مش هنعرف نعوضه وهنندم حيث لا ينفع الندم
= إيه ده في إيه ؟! قصدك إيه أنا مش فاهمة ؟!
– جاوبيني بصراحة ، كيلو السكر فيه كام معلقة ؟
= يا سلاااام ! معرفش طبعًا أنا هقف إعدُه ؟!!
– أنا عديته يا هانم .. ١٨٣ معلقة
= هاااااه ، إنتَّ لما كنت واقف في المطبخ طول النهار كنت بتعد كيلو السكر فيه كام معلقة يا ونيـــس ؟!!
– ونيس بتاع زمان خلاص أنتهى ، إنتي خربـ ـتي بيتي يا مايسة ، ١٨٣ معلقة سكر وإحنا ٦ بناخُد كل يوم ٦ كوبايات شاي
= لأ ساعات أكتر ، مش ساعات بيجلنا ضيوف !
– ده عهد أنتهى يا مايسة خلاص ، كل واحد من هنا ورايح مصروفله معلقة سكر في اليوم وإحنا ٦ يبقى ٦ معالق في اليوم في الشهر بـ ١٨٠ معلقة شاي ، فاهم هتقوليلي ١٨٣ هيتفضل ٣ معالق نبقى نعمل بيهم أي حاجة حلوة
= لالالا ده إنتَّ أكيد إتجنـ ـنت !
– قصدك فوقت ، فوقت من النهيبة اللي إنتوا عايشين فيها
= نهيبة ؟! أنا بسرقـ ـك يا ونيس ؟!!
– أنا مقولتش كده ، بس الإيدين السايبة تعلم السرقـ ـة
= لالالا ، لا يا أستاذ خلاص من الشهر ده انت اللي هتمسك مصروف البيت
– لا يا هانم إنتي لازم تساعديني ، العالم يا مايسة مُقبل على أيام سـ ـودة ، مُقبل على مجاعـ ـة ، لا إسراف في أي شيء ، لا إسراف في الطعام ، لا إسراف في الماء ، لا إسراف في الغاز ، لا إسراف في الملابس ، القرارات دي هتتنفذ علينا وعلى ولادنا .. التلفزيون يتفتح في اليوم نُص ساعة بس عشان إستهلاك الكهربا
= طب ما كمان بالمرة نشيل جرس الباب عشان برضو تي تي تي دي بتستهلك كهربا !
– صح بدأتي تفهميني يا مايسة ، تي تي تي دي بتستهلك كهربا يخبطوا على الباب أفضل والمذاكرة تبقى بنهار عشان هقطع عليكم النور من الساعة ٨ بليل
= والصابون ، صابونة المواعين تبقى هي صابونة الأرض وتبقى صابونة الوش !
– هي صابونة الحموم انتي عايزة تعملي سيستم بحاله بقى عشان نبقى ماشيين مظبوط ، ومفيش دروس خصوصية
= طب ما بلاش مدارس بقى خالص عشان برضو المصاريف ، مصروفات وكُتب وأقلام وكده !
– لأ يا مايسة العِلم محتاج إسراف بس كل عيل كل المواد بتاعته تبقى في كشكول واحد وقلم رصاص واحد ، البراية تبقى معايا اللي عايز يبري يجيلي أنا إبريله مش يقعد القلم شهرين ترترترتر يخلص في شهرين لأ ، ممكن أعتمد عليكي تخلي الأستيكة معاكي يجي يبري عندي ويمسح بالأستيكة ويأستك عندك .. بس براحة عشان ماتخلصش بسرعة
= طب والأكل ؟ النظام ده برضو هيطبق على الأكل ؟!
– مايسة أنا كنت مُعتقد إنك فاهمة المسألة كلها ، الأكل هيبقى جبنة وزتون .. الجبنة القريش مُغذية جدًا
= بس كده يبقى إسراف الاتنين في اليوم ؟! ما نخلي يوم جبنة ويوم زتون !
– معنديش مانع بس أنا كنت عامل برنامج عشان مشعرش الأولاد بالملل ، يبقى يوم زتون إسود ويوم زتون أخضر إنما مفيش مانع
= مفيش لحمة خالص ، ميبقاش فيه لحمة ؟!!
– معقول يا مايسة ! يعني وصلت المسألة للجلدة في الحكاية ديَّا ، لأ طبعًا في لحمة كل أسبوع .. مرة واحدة نُص كيلو يتقطع ست حِتت
= طب خليه رُبع عشان مش هاكُل ، أنا مش عايزة !
– بجد ؟! ماشي أوكيه يبقى رُبع كيلو لحمة ، عايزين نوفر عايزين نحوش ، يا مايسة لازم نُربط الأحزمة وليه أحزمة ؟! ما كفاية حزام واحد
لا تعليق