خلاص شم النسيم قرّب، علشان كده النهارده هنعمل مع بعض أفكار مميّزة علشان تجهّزي بيتك لاستقبال شم النسيم، وتقدري كمان تخلّي أطفالك يشاركوا معاكي في تحضير البيض الملوّن..
سلة بيض شم النسيم
الأدوات المستخدمة:
علبة بلاستيك
قطعة قماش (باللون اللي تحبّيه)
شريط قماش باللون الأخضر
شريط لاصق من الجانبين
ورق كروشيه
ورق مقوّى ملوّن
صمغ
الطريقة:
1- هاتي قطع من شريط اللاصق من الجانبين وحطّيها على العلبة، والزقي عليها قطعة القماش، وشيلي الزوايد أو اتنيها جوه العلبة والزقيها بالصمغ.
2- هاتي الشريط الأخضر وقصّيه على شكل مثلثات، والزقيه في آخر العلبة.
3- اعملي بالورق المقوّى أشكال مختلفة زي بطة أو أرنب، وممكن تجيبي ستيكرات جاهزة، وبعد كده الزقيهم على العلبة باستخدام الصمغ، علشان تزيّنيها بشكل جميل.
4- بعد كده هاتي قطعة قماش من نفس اللون اللي غلّفتي بيه العلبة وقصّيه على شكل مستطيل عريض شوية بطول مناسب علشان تعملي به إيد للعلبة، وحطّي بنفس طول القماش الشريط اللاصق، واتني أطراف القماش عليه (زي ما هو واضح في الفيديو).
5- الزقي الإيد اللي عملتيها على العلبة من الطرفين باستخدام الصمغ، وسيبيه ينشف شوية علشان تعرفي تمسكي العلبة منها.
6- قصّي الورق الكروشيه على شكل شرايط وحطّيها داخل السلة علشان تعمل شكل القش، وبعد كده تقدري ترصّي فيها البيض الملوّن.
بيض ملوّن برسوم بسيطة
لوّني البيض مع أطفالك برسوم سهلة وألوان طبيعية علشان تكون صحية.
الأدوات المستخدمة:
بيض مسلوق
كركديه
بقدونس
استيكر بأشكال مختلفة (نجوم وفراشات وقلوب)
الطريقة:
1- هاتي 3 حلل وحطّي فيهم ميه وخل، وضيفي في أوّل حلة الكركديه وفي التانية البقدونس، واغليهم لغاية ما تتلوّن الميه بلون البقدونس والكركديه، وسيبيهم يبردوا.
2- هاتي البيضة والزقي عليها الاستيكرات اللي عايزاها أو اللي أطفالك هيحبّوها، وبعد كده حطّي البيضة في الكركديه وقلّبيها لغاية ما تبقى لونها أحمر، وطلّعيها ونشّفيها بمناديل ورقية.
3- شيلي الاستيكرات من على البيضة وحطّي عليها استيكرات تانية بأشكال مختلفة في الأماكن الفاضية، وحطّيها بعد كده في البقدونس، وقلّبيها لغاية ما تاخد اللون اللي عايزاه، وطلّعيها ونشّفيها بالمناديل وشيلي الاستيكرات.
4- رصّي البيض في السلة اللي عملناها واستمتعي بيها مع عيلتك على سفرتك في فطار شم النسيم.
بيض ملوّن من الخيط
اعرفي معانا إزاي تعملي نجفة على شكل بيضة شم النسيم، وهتكون ملوّنة بألوان جميلة وجذّابة، وتقدري كمان تعلّقيها في شقتك أو تحطّيها في أماكن مختلفة فيها.
الأدوات المستخدمة:
بالونات
نشا مذابة في كمية ماء
خيوط كروشيه بألون مختلفة
الطريقة:
1- انفخي البالونات بالأحجام اللي إنتي عايزاها واربطيها بخيط طويل، وحطّي بعد كده الخيط في خليط النشا ولفّيها على البالونة بشكل عشوائي، وممكن تدخّلي كذا لون مع بعض، وسيبيها لغاية ما الخيط ينشف ويبقى متماسك.
2- اعملي فتحة في البالونة من فوق علشان تفرّغيها من الهوا، وطلّعيها من الشكل البيضاوي اللي عملناه.
3- علّقي البيض اللي عملتيه من الخيط في البيت، وممكن تحطّيها على الأرض في الصالة أو على السفرة علشان تدّي شكل جميل ومميّز.
زينة شم النسيم لغرفة الأطفال
اعملي أشكال جميلة بإيدك وخلّي أطفالك يساعدوكي علشان تعلّقيها في غرفتهم وتجدّدي من شكلها في شم النسيم.
الأدوات المستخدمة:
ورق مقوّى ملوّن أو سادة
شرائط ستان رفيعة
قطن
الطريقة:
1- هاتي ورقة من الورق المقوّى واتنيها نصين، وارسمي في جنب واحد مِن الناحية المقفولة أذن أرنب وملزوق فيها نص دايرة علشان تعملي شكل وش أرنب، وبعد كده قصّي الرسمة اللي رسمتيها، واعملي بعد كده في كل أذن فتحة صغيرة علشان تدخلي فيها شريط الستان (زي ما هو واضح في الفيديو).
2- كرّري الرسمة دي أو نوّعي بين الأشكال اللي تحبّيها، ومرّري فيهم شريط الستان علشان تعملي فروع زينة تقدري تعلّقيهم في الشقة.
3- هاتي القطن وشكّليه كور صغيرة والزقيه في وش الأرنب علشان تعملي فم الأرنب، وتقدري تخلّي أطفالك يساعدوكي في تلوين الورق اللي عملتيه أشكال لو كان سادة.
وبكده تقدري تزيّني شقتك وتستقبلي شم النسيم بطريقة مختلفة وجميلة وهتسعد أطفالك.
لا تعليق