أوقات كتير بنسافر سواء مصيف أو سفر للشغل، وفي الحالتين بيكون فيه أولويات عندنا لازم ناخدها معانا غير الهدوم زي الشامبو والكريمات والمكياج، وفي نفس الوقت ممكن مانلاقيش شنطة تكفي كل ده وممكن حاجة فيهم تتعرض للكسر.
النهارده جبنا لك طريقة بسيطة جدا تقدري تعملي بيها شنطة سفر للمكياج بتاعك، وكمان للشامبو والكريمات اللي ممكن تحتاجي لها..
الأدوات المستخدمة
منشفة
قطعة قماش بالشكل اللي تحبيه (من 90 سم إلى متر)
علبة صمغ للقماش
مسطرة كبيرة أو متر
شريط ستان ملون
الطريقة:
1- قصّي المنشفة بحيث يكون الطول 56 سم، والعرض 66 سم، وقصّي قطعة القماش بحيث يكون الطول 36 سم والعرض 66 سم.
2- اتني طرف المنشفة العريض بمسافة 1.25 سم واضغطي عليه بالمكواة الساخنة أو ممكن تلصقيه بالصمغ.
3- وبعدين ارسمي بالمسطرة خط بالعرض على ارتفاع 20.3 سم من الطرف المثني للمنشفة، وارسمي على الخط ده 4 خطوط طولية وكل خط طوله 20.3 سم، وخلي بالك إن تكون المساحات بين الخطوط متساوية، وادهني الخطوط الطولية بالصمغ.
3- اتني الجزء الأسفل من المنشفة على الخطوط الطولية زي ما هو موضح في الفيديو، وسيبيها لعدة ساعات لحد ما الصمغ ينشف، وبعد كده هاتي قطعة القماش واتني طرفها العريض بمسافة 1.25 سم واضغطي عليها بالمكواة الساخنة.
(ملحوظة: بلاش تلصقيها بالصمغ).
4- هاتي المنشفة وافردي الصمغ على 3 من أطرافها (2 طول وعرض واحد)، وبعدين افردي عليها القماش بحيث تكون قطعة القماش مقلوبة وظهرها لفوق، والجزء المثني منها عند الجزء المثني في المنشفة.
ملحوظة: ممكن تستبدلي الصمغ بماكينة الخياطة، أو ممكن كمان تخيّطيها على إيدك.
5- قصّي مثلث صغير من كل طرف، وبعدين اقلبي الشنطة واكويها بالمكواة، هتلاقي إن فيه جنب أخير مفتوح ممكن تلصقيه بالصمغ أو عن طريق الخياطة.
6- اثني المنشفة زي ما هو موضح في الفيديو، وبعدين لفّي عليها الشريط والصقيها من الأعلى بالصمغ، وممكن تحطّي عليها دبوس علشان تدّي له شكل، وبكده تكوني عملتي الشنطة وهتقدري تسافري في أي مكان من غير ما تكوني شايلة هم المكياج أو أدواتك الخاصة.
وبكده تكوني عملتي شنطة تحطّي فيها الشامبو وأدوات الميك أب والمكواة، وتاخديها معاكي في أي مكان.
لا تعليق